古語有云：「天將降大任於是人也，必先苦其心志，勞其筋骨，餓其體膚，空乏其身，行拂亂其所為。」胡栢賢（Trevor）對呢句說話應該百感交集。Trevor 係香港健美體操運動員，同時係健身體操中心 FLAIR 嘅創辦人，用運動企業家嚟形容佢亦不為過。Trevor 18歲先開始佢嘅健美體操生涯，訓練期間除咗留意到自己喺運動上嘅表現同限制，佢亦睇到運動員裝備喺市場上嘅不足，於是佢由開發同生產健美體操鞋開始，再到運動培訓，逐步擴展佢嘅企業版圖，希望喺各方面幫到同樣想精進自己嘅運動人。喺呢段時間，Trevor 遇到大大小小、諗過同冇諗過嘅問題，想知運動員嘅身份點幫到佢發展事業；佢嘅事業又點樣幫到熱愛運動嘅人？留意今集《又係我牛英》。 主持：牛英 嘉賓：運動企業家 胡栢賢 Trevor Sportunes…

喺「躺平」呢個詞語興起之前，我哋成日都會聽到 Hea 呢個字。Hea 畀人感覺係隨便、懶散同唔上心，但無繩滑水（Wakesurf）運動員吳曉盈（Angel）就認為，Hea 係放鬆同放慢嘅意思，佢自己亦係一個會 Hea 嘅運動員。咁人哋有冇覺得佢唔認真？Angel：「有成績咪唔會囉！」Hea 係 Angel 嘅減壓之道，但一眾「誇誇群」朋友都係佢成功擺脫壓力嘅幕後功臣，呢班朋友平時究竟有幾「誇」呢？想 Hea 又唔敢 Hea，或者一直 Hea 底上唔返水嘅你，係時候要聽吓今集 Angel 嘅分享喇！ 主持：椰青 嘉賓：Wakesurf 運動員 吳曉盈 Angel Sportunes 網站 | www.sportsoho.com/sportunes Instagram | www.instagr…

有冇試過買廢水嗰陣要求「少甜」或者「走甜」，飲完仲要後悔？又有冇試過增肌減脂期，連甜品 Menu 都唔敢睇？甜品一向被冠上「邪惡」之形容詞，運動狂熱分子 Iris 決定要幫佢哋平反，仲因為咁開咗間 Cafe，希望所有想身體健康嘅運動及非運動人都有個位，搵到自己想要嘅嘢，食晏、嘆甜品、飲咖啡都唔使就住就住。本身極度熱愛運動嘅老闆娘 Iris，無端端點解會推廣起「減糖」，繼而全身投入餐飲業？Cafe 營業時間唔算長，原來係因為老闆娘同員工放工要做運動！今集《又係我牛英》有 Liffee 老闆娘親自分享佢嘅健康生活同飲食之道 😋 主持：牛英 嘉賓：運動狂熱分子 老闆娘 Iris @Liffee.HK Sportunes 網站 | www.sportsoho.com/sportunes Instag…

「除咗運動員呢個身份，要記得你仲係一個人。」運動心理學家盧綽蘅（Karen）如是說。唔少運動員會搵心理學家傾偈同輔導，今集 Karen 就同大家分享咗少少運動員經常遇到嘅問題同困擾。Karen 話，同運動員傾偈，就好似搣洋蔥咁，要一層一層細心地了解同跟進，表面睇到嘅煩惱未必就係最影響運動員嘅問題。以比賽壓力為例，運動員有壓力未必係因為佢睇重輸贏，原來有機會係擔心自己同教練嘅關係會變差？通常星期五同星期日就係 Karen 最忙嘅時候，又係因為咩原因呢？今集《Sportsomate》，一齊學吓點樣支持同聆聽我哋嘅運動員朋友！ 主持：椰青 嘉賓：運動心理學家 盧綽蘅 Karen Sportunes 網站 | www.sportsoho.com/sportunes Instagram | www.i…

跑步教練吳嘉諾（Kanok），細個曾經因為哮喘而被禁止參加體育活動，但呢啲阻撓並冇動搖過 Kanok 想運動嘅心。喺中學初嚐跑步攞第一嘅滋味，Kanok 又再行多步，接受正規長跑訓練，如是者一步一步跑到做教練，仲創立埋 Big Big Track Club 跑團，點著埋其他人團火。跑步唔係想像中咁簡單，但要迷上跑步就好容易，好似 Kanok 喺節目中多次提到：要開心，開心最緊要。半馬跑出 PB，全馬竟然抽筋失利，Kanok 依然主張「笑住返終點」。比賽條路可能只得幾十公里，但跑步條路其實好長，點樣可以令自己一直跑落去？聽吓今集 Kanok 嘅分享啦！ 主持：牛英 嘉賓：吳嘉諾 Kanok @Big Big Track Club Sportunes 網站 | www.sportsoho.com…

「上天為你關了一扇門，就會為你開一扇窗」今屆巴黎奧運見唔到香港女子重劍代表連翊希（Coco）上陣，但奧運劍擊同佢嘅連繫可能比上屆東京奧運更強，因為今年係 Coco 首次以劍擊評述員身份出現喺各家各戶嘅電視入面。第一次踏入尤如戰場嘅錄影廠，分秒必爭、計劃趕不上變化嘅直播時間，令 Coco 大開眼界之餘，亦令佢有機會用上帝視角去睇劍擊運動嘅種種，重新思考自己同劍擊甚至奧運嘅關係。一邊評述隊友嘅比賽，一邊擔心佢哋嘅發揮，究竟係一個點樣嘅體驗？喺奧運場上比賽嘅緊張，同坐上評述台前嘅緊張有咩唔同？ 主持：椰青 嘉賓：香港女子重劍代表 連翊希 Coco Sportunes 網站 | www.sportsoho.com/sportunes Instagram | www.instagram.com/spo…

香港健美代表翟佩君（Cadee），早前代表香港出戰第56屆亞洲健美錦標賽，除咗贏得健體小姐組別亞軍，亦為港隊攞到女子一件式泳裝組別嘅冠軍，但原來佢嘅健美歷程只有兩年！短短兩年，佢係點樣由健身教練一路行到上健美舞台？健美由健康開始，但健美又唔等於健康？Cadee 熱愛運動，成為教練同運動員之後，仲考埋國家級營養師資格，食嘢同運動雙管齊下，唔怪得能夠「美」夢成真。Cadee 對自己非常嚴格，但對學生就盡量貼地，今集《又係我牛英》，Cadee 就教咗幾招入門貼士，唔鍾意做運動嘅朋友都啱用，輕輕鬆鬆行出第一步！ 主持：牛英 嘉賓：香港健美代表 翟佩君 Cadee Sportunes 網站 | www.sportsoho.com/sportunes Instagram | www.instagram.…

好多女仔聽到要做運動都好多擔憂，怕流汗又怕曬，一陣又驚畀蚊咬⋯⋯明明知道踏出第一步，就可以同「運動」連結，但嗰一步偏偏就好似隔咗個海咁。有人陪會唔會好啲呢？梗係會啦，你見中學去個廁所都要同朋友同行就知啦。Miss Run 體能班嘅主教練簡杏芳（Elco）深明呢個道理，所以同拍檔組織咗呢個畀大家 Run 返起自己身體嘅全女生體能班，跑都係其次，郁先係重點！大家圍埋一齊瞓地下，抬腿傳波再寫字，笑住玩，啲時間眨吓眼就過。你全件衫濕晒，我啲汗一滴滴沿住額頭流落下巴，但一啲都唔尷尬，運動女生 Get！ 主持：椰青 嘉賓：田徑教練 簡杏芳 Elco Sportunes 網站 | www.sportsoho.com/sportunes Instagram | www.instagram.com/sport…

做運動，除咗講體格，食腦都好重要。因為奏效嘅策略係可以令你喺比賽中從後趕上，逆轉結果。香港三項鐵人代表黃子圖，就係一位講策略嘅選手。對子圖嚟講，「努力」係運動員嘅基本配置，要突破同場對手，調極心態同策略就係分高低嘅關鍵。游水、踩單車同跑步，拆開每一樣都需要極大體能，更何況係三樣一齊玩？所以比賽中嘅細節尤為重要，連「與抽筋共存」都要練！今集《又係我牛英》，子圖會同大家分享訓練同比賽嘅心得，原來如今成績突出嘅佢，以前係唔鍾意三鐵？失約巴黎奧運嘅子圖，嚟緊嘅洛杉磯奧運會唔會就係佢嘅囊中之物？喺奧運之前，我哋仲可以喺邊度見到呢位鐵人嘅星火呢✨？ 主持：牛英 嘉賓：香港三鐵代表 黃子圖 Sportunes 網站 | www.sportsoho.com/sportunes Instagram | www…

堅持 Vs. 放棄，對大部分運動人嚟講都係殘酷二選一；但對由單車運動員轉換為跑手嘅黃亦皜（Parco）嚟講，兩者嘅本質其實都係一樣 —— 選擇。兩年前嘅一場交通意外，為 Parco 帶嚟一條有間尺咁長嘅大疤痕，亦為佢帶嚟一次重新開始嘅機會。旁人睇，佢好似被逼「放棄」咗啲嘢，但當下嘅人生，係咪淨係得「堅持」兩個字？我哋成日將「放棄」睇到好負面，有冇諗過佢其實係一個時機，畀你發掘更多值得「堅持」嘅路向？掙扎緊嘅你，You're not alone！因為今集《Sportsomate》嘉賓黃亦皜 Parco 一樣掙扎過！ 主持：椰青 嘉賓：山賽好手 黃亦皜 Parco Sportunes 網站 | www.sportsoho.com/sportunes Instagram | www.instagr…

唔知幾時開始，「好勝」成為咗負面評價，令好多運動員唔敢公開表示自己想贏，香港青年單車代表羅智賢（Samuel）係例外。自細接受三項鐵人訓練，Samuel 都企過唔少次頒獎台，但隨住年紀漸長，Samuel 開始發現自己未及身邊嘅對手。因為想贏，Samuel 毅然決定轉換跑道，專注踩單車，16歲嘅佢形容呢個係一個「新開始」。因為有求勝嘅意識，大至比賽心態； 小至單車上嘅硬件配置，Samuel 都選擇搏盡，亦因為咁，佢終於喺今年全國青少年 U 系列公路自行車錦標賽踏上團體冠軍嘅台階。Samuel 話今次常州之行非常難忘，想知 40 度天氣下嘅佢經歷過啲咩？起飛前又點解會著起咗反光衣行落停機坪？立即收聽今集《又係我牛英》！ 主持：牛英 嘉賓：青年單車運動員 羅智賢 Samuel Sportunes …

有人話龍門係球隊入面最孤獨嘅角色，但女子足球港隊守門員、和富社企嘅隊長周錦儀（Kelly）就認為，只要係球隊一員，任何時候都係分享緊同等嘅喜悅。既係足球員，又係教練，仲係球隊物理治療助理，人生幾乎同足球分唔開，不過 Kelly 仍然未滿意，依然向緊「100%足球人生」呢個方向進發。細個曾經被反對踢波，連參加足球訓練班都唔敢同屋企人講嘅 Kelly，今日見到父母入場睇比賽有咩感覺？面對舉手話要做守門員嘅女學生，Kelly 又係點樣應對？喺 Kelly 心目中，有啲咩特質先能夠成為一位出色嘅龍門呢？ 主持：椰青 嘉賓：港隊守門員 周錦儀 Kelly Sportunes 網站 | www.sportsoho.com/sportunes Instagram | www.instagram.com/s…

全城為奧運場上健兒高興，其實仲有啲港產工作人員值得大家驕傲，三人籃球國際裁判何明達（Edmond） 就係其一。繼上屆喺東京奧運吹判三人籃球決賽，今屆巴黎奧運都有 Edmond 嘅踪影，呢一次亦係佢喺掛哨前嘅 "Last Dance"。少啲出現喺場上，唔代表佢就此放棄醉心嘅三人籃球，因為 Edmond 已經加入咗國際籃球總會（FIBA）擔任三人籃球裁判主管一職，用另一個方法發展同推廣佢熱愛嘅運動。由屋邨街場、學界賽事吹哨吹到上奧運籃球場，呢條路係點行出嚟？Edmond 又覺得喺呢幾個場合做球證，有啲咩唔同？ 主持：牛英 嘉賓：FIBA 三人籃球裁判主管 何明達 Edmond Sportunes 網站 | www.sportsoho.com/sportunes Instagram | www.i…

熱血對你嚟講，係咩意思？對運動 Slasher 陳慧賢（Vera）嚟講，熱血並唔係「明知不可為而為知」，而係相信人生嘅可能有千百種，每樣都要試盡同畀盡。 曾經入選跆拳道港隊嘅 Vera，最後並冇繼續留喺跆拳道發展，但為咗成為一位動作女演員，佢重返道館，花心機花錢花時間就係為咗練好一個540旋踢，縱然最後嘅拍攝並冇用到呢一招。成日話做咗大人，熱血就會燃燒殆盡，有冇諗過如果啲血真係夠熱，無論你係大人定細路、無論你轉換咗幾多條跑道，都會去到你最終嘅目標？ 主持：椰青 嘉賓：運動 Slasher 陳慧賢 Vera Sportunes 網站 | www.sportsoho.com/sportunes Instagram | www.instagram.com/sportunes_by_sportsoh…

因為姓氏而被香港人留意，係因為刁俊稀（Felix）喺比賽前嘅一個動作：當時佢指住自己嘅號碼布，話畀鏡頭前嘅大家知，佢就係代表香港出戰巴黎奧運100米賽事嘅跑手。5月喺香港錦標賽中跑出10秒33刷新個人最佳時間，Felix 都唔敢肯定自己能夠出戰奧運，直至奧運開幕前嘅一個月，Felix 先知道自己嘅夢想成真。田徑場上坐滿觀眾，對 Felix 嚟講已經足夠夢幻，喺紫色嘅跑道上預備嗰陣，佢諗緊啲乜？Felix 坦言起跑前有手震，但就唔係因為緊張，咁係咩原因？今集《又係我牛英》，我哋同呢位百米飛人一齊感受奧運零距離！ 主持：牛英 嘉賓：香港100米奧運代表 刁俊稀 Felix Sportunes 網站 | www.sportsoho.com/sportunes Instagram | www.ins…

比賽前要傾偈，唔只同隊友傾，仲要同對手傾？有別於一般團體運動，極限飛盤係一項非接觸式、自我裁判嘅運動，所以參與賽事嘅運動員，需要非常熟悉比賽規則之餘，仲要事前就清楚對手嘅底線，否則比賽就唔能夠順利進行。唔可以身體接觸，又要搶到對方手持嘅飛盤，港隊成員劉浩晴（Stephanie）形容，呢啲就係極限飛盤好玩嘅地方！喺外國讀書嗰陣已經接觸呢樣運動嘅佢，因為「太好玩」嘅關係，返到香港就自薦參與中國香港飛盤總會舉辦嘅比賽同訓練，嚟緊10月仲會幫手搞個以香港為主場嘅香港泛亞極限飛盤賽。喺有限嘅資源下，佢會點安排一個好玩得嚟又競爭性十足嘅國際賽事？ 主持：椰青 嘉賓：極限飛盤港隊成員 劉浩晴 Stephanie Sportunes 網站 | www.sportsoho.com/sportunes Inst…

細個因為身型而被老師邀請推鉛球，點估到健身教練許少宇（Davis）最後情歸跑步？Sub-3 一直係 Davis 嘅目標，雖然暫時都仲係同呢個目標擦身而過，但 Davis 堅信有一日佢會做到。喺達成目標之前，每個喺跑步上得到嘅覺悟，都會係 Sub-3 嘅一部分。呢啲覺悟可能係來自跑步中嘅靜思；可能係來自「互相逼害」嘅跑友；亦可能來自一樣喺 Sub 3 邊緣掙扎緊嘅大家。如果睇緊呢個 Post 嘅你，跑到有少少失去方向，不妨聽吓今集《又係我牛英》，可能你會喺 Davis 口中搵到啲繼續跑落去嘅理由！ 主持：牛英 嘉賓：健身教練 許少宇 Davis Sportunes 網站 | www.sportsoho.com/sportunes Instagram | www.instagram.com/sp…

「當你真心渴望某樣嘢，成個宇宙都會聯合起嚟幫助你完成。」呢句說話曾經鼓勵過無數咁多位運動人，亦令我哋思考究竟「相信」嘅力量有幾大。活躍運動圈嘅本地歌手盧巧音（Candy）就話，相信自己做到，比起想自己做到來得容易。同 Candy 一樣熱愛跑步嘅你，可能都曾經為自己訂立過好多唔同嘅目標，想PB、想攞牌、想有好成績等等，但真係未必次次都如你所願，咁係咪即係你信錯咗自己？試過撞牆，又試過受傷，Candy 話佢都冇懷疑過自己，唔通佢訂目標嘅步驟同其他人唔同？跑步、游水、打拳以外，Candy 近來仲做埋 Stick Mobility 助教，呢段時間，佢向宇宙下咗啲咩訂單？今集《Sportsomate》，椰青同你一齊跟 Candy 學許願，做個更好嘅自己！ 主持：椰青 嘉賓：樂壇跑手 盧巧音 Candy…

200米，10.76秒。場地單車運動員馬正匡（Nicholas ），近年喺本地及國內外單車賽嶄露頭角，早前就喺2024全國青少年U系列場地自行車錦標賽攞到一銀一銅嘅佳績，其中嘅個人計時賽，只係用咗10.76秒就完成200米，同金牌得主嘅成績僅僅相差0.1秒。平時喺香港練習，絕大部分都係有冷氣嘅室內練習場，今次去到蘇州一嚐烈日下嘅室外場，Nicholas 笑言「以為自己就嚟死」。同場比賽嘅人個個都身材魁梧， Nicholas 落場嘅時候諗緊咩？上到頒獎台嗰刻，對手見到 Nicholas 又有咩感受？單車畀到 Nicholas 一份自由自在嘅感覺，但訓練嘅每分每秒都唔係容易，今集《又係我牛英》有 Nicholas 同大家分享當中嘅苦樂點滴。 主持：牛英 嘉賓：單車新星 馬正匡 Nicholas …

"Trust Yourself!" 張家朗喺奧運金牌戰打到 12:14 嘅時候，教練喺場邊對住佢大嗌。相信自己，係每個人都要學習嘅課題，尤其係運動員。今集《Sportsomate》嘉賓，楊鎧駿 （大Dee）都學習緊。外表靚靚仔仔，跑得又睇得嘅大Dee，原來一直都冇乜自信。曾經創出佳績入選香港田徑代表隊，又試過跑樓梯跑到全球總排名第5，但喺佢心入面仍然覺得自己做得唔好。運動員喺鞭策自己同相信自己兩方面，要搵到一個平衡點真係好難！當初讀緊書嘅大Dee，同而家已經涉獵咗唔同領域嘅大Dee，喺訂立運動目標嘅時候會唔會有唔同呢？ 主持：椰青 嘉賓：長跑好手 楊鎧駿 大Dee Sportunes 網站 | www.sportsoho.com/sportunes Instagram | www.insta…

北海峽（North Channel）位於北愛爾蘭同蘇格蘭之間，被譽為「世界七大海峽挑戰」中難度最高，有人更加將北海峽形容為海上嘅珠穆朗瑪峰，港人梁俊曦（Ryan）偏偏就要向極限挑戰，仲成功成為第一位完成呢項創舉嘅香港泳者。用14個鐘頭橫渡水溫只有攝氏11度嘅大海，喺長達40公里嘅旅程中遇過高過人嘅水母；經歷好幾次水流改變，游一米退兩米；熱水裝置失靈；出現幻覺⋯⋯ Ryan 游緊水嗰陣究竟諗緊啲咩？中途係點補給？想挑戰嘅人，事前又要做啲咩預備？ 主持：牛英 嘉賓：首位成功橫渡北海峽港人 梁俊曦 Ryan Sportunes 網站 | www.sportsoho.com/sportunes Instagram | www.instagram.com/sportunes_by_sportsoho …

有別於艷麗又帶挑逗性嘅舞步，具有健身教練身份嘅鋼管舞者 Shawn Tung 選擇「著最簡單嘅衫，練最辣嘅招」。基本招式多練就會掌握，但要擁有呢一身功夫，Shawn 仲做咗啲咩？跳鋼管舞竟然有如武俠小說中嘅幫派修練，形容自己係「劍走偏鋒」嘅 Shawn 話鋼管舞同丐幫尤其相似，究竟係深造嘅內容似，定講緊香港嘅鋼管舞文化吖嗱？鋼管舞界嘅男舞者依然係少數，但如果佢哋鑽研嘅係比較適合男性身體構造、或者男舞者更有優勢嘅舞步，咁佢哋會唔會變返多數呢？ 主持：椰青 嘉賓：鋼管先生 Shawn Tung Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebo…

去年接連打破女子400米U20及U18香港學界紀錄，17歲混血小飛人徐穎恩（Jane）從未言倦，隨後更加喺亞洲少年U18田徑錦標賽再下一城，於烏茲別克什干嘅賽場上，將個人400米紀錄推前至55秒68，一舉摘銅。 冇屋企人陪住出國，Jane 話今次烏茲別克之旅非常興奮，賽後仲同嚟自世界各地嘅跑步好手交換咗聯絡方法𠻹！呢位跑步女將目前隨咗喺學校訓練，亦有分別參與體院同飛達田徑會嘅訓練，一星期跑咁多日，Jane 嘅時間係點分配？嚟緊就要考 DSE ，佢又有咩打算呢？ 主持：牛英 嘉賓：新生代女飛人 徐穎恩 Jane Sportunes 網站 | www.sportsoho.com/sportunes Instagram | www.instagram.com/sportunes_by_sports…

台灣係近年港人潛水熱點，Jying 就連個 Padi 水肺潛水教練牌都係喺台灣考返嚟。當初暈住船浪入到綠島，一留就留咗兩三年，每日嘅生活就係同學生潛入清澈見底嘅大海睇魚睇珊瑚，又或者近距離觀察趴喺礁石休息緊嘅海龜，再經佢哋雙眼進入另一個更寧靜嘅世界。周遭嘅人，尤其係喺香港生活緊嘅朋友，見到 Jying 嘅綠島日常，一般都係既羨慕又妒忌。「我都好羨慕我自己。」Jying 笑言。不過人在異鄉，日子當然係一半苦澀一半甜，今集《Sportsomate》，不如就聽吓，喺陽光、海水同古銅色皮膚嘅後面，Jying 仲要獨自面對啲咩課題？ 主持：椰青 嘉賓：潛水教練 Jying Sportunes 網站 | www.sportsoho.com/sportunes Instagram | www.instag…

嚟自 DarkArt 車隊嘅單車運動員 李偉樂（樂哥）踩車資歷唔算太深，2019年到而家只有大槪5年經驗，不過喺圈內已經有唔少人聽過佢個名，因為大家經常會喺蒲崗村道單車賽嘅頒獎台上見到佢。會將 "All In" 掛喺嘴邊嘅樂哥最近仲自費同港隊一齊去咗哈薩克比賽，五日四夜嘅行程，似乎每一刻都有嘢落袋：「一生人一定要最少去一次！」預備比賽嘅過程唔容易，淨係要保持到喺香港比賽嘅成績已經夠樂哥來回地獄好幾次，係點樣嘅信念支撐樂哥用9分39秒就踩到上飛鵝山？進步神速嘅背後樂哥做咗啲咩呢？今集《又係我牛英》，一齊跟呢位單車運動員偷下師。 主持：牛英 嘉賓：單車運動員 李偉樂 Sportunes 網站 | www.sportsoho.com/sportunes Instagram | www.instag…

機組服務人員一直都係唔少自由靈魂夢寐以求嘅工作，環遊世界自由自在吖嘛！因為做運動而決心成為機師嘅江天賜（Samuel）又點諗呢？當大家都以為佢去到外地實會把握時間觀光搵好嘢食，Samuel 就話搵個靚嘅健身室一樣咁開心。飛過咁多個國家，邊個地方嘅健身風氣最好？返工有時日夜顛倒，飛一轉紅眼機，抵步已經係凌晨時間，佢又係點平衡自己嘅作息同運動生活？曾經係一位會到世界各地比賽嘅 B-boy, Samuel 近年就選擇花更多時間係 CrossFit 上面，原因原來好簡單！今集《Sportsomate》，歡迎上機，同香港機師 Samuel 一齊健身遊世界。 主持：椰青 嘉賓：CrossFit 機師 江天賜 Samuel Sportunes 網站 | www.sportsoho.com/sportune…

YouTube 頻道 Ling Lau，主理人劉峻崚（Ling）其實係一位三鐵教練，細個沉迷單車，近年就醉心跑步。不時喺頻道分享跑步心得嘅 Ling，喺啱啱過去嘅「飛越啟德 100km 跑步機慈善挑戰賽」，就同一班後生仔女組成咗 Generation Z 跑隊參賽，成績仲非常唔錯㖭！Ling 話佢哋嘅比賽策略喺開跑前仲變緊，目標清晰、當機立斷果然好重要呀下 😏 成功達標固然要分享，撞牆經驗都要討論吓先會進步，今集《又係我牛英》同 Ling 一齊回顧過往大大小小嘅比賽，調整吓嚟緊嘅練跑計劃先 😎 聽完 Podcast 最緊要係咩？記得拎褸！ 主持：牛英 嘉賓：「記得拎褸」真身 劉峻崚 Sportunes 網站 | www.sportsoho.com/sportunes Instagram | …

10年嘅時間，由當初為「型」而玩街頭健身，到成為港隊代表做埋教練，再到自己搞街頭健身比賽，仲整咗個「室內公園」出嚟畀同好，莫皓然（M2）竟然話其實唔難？講笑咩！不過關關難過關關過，回想起自己嘅努力同付出，多謝自己有堅持到底，又真係會想同自己講返句其實唔難嘅。做咗教練咁耐，主張上堂係最冇用嘅 M2 見盡人生百態，最容易令佢動怒嘅，係咩類型嘅學生？佢仲好激動咁話：「畀一百萬我都唔會再教！」街頭健身明明出自街頭，點解 M2 又要搞個室內公園出嚟呢？ 主持：椰青 嘉賓：香港街頭健身總會主席 莫皓然 M2 Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Fac…

全港運動會田徑賽事喺5月尾順利完賽，其中800米賽事備受矚目，因為同屬必達跑會嘅兩位跑手喺冠軍同亞軍之間鬥得難分難解之餘，仲雙雙破咗塵封25年嘅香港紀錄。Sean Fontaine（方賢明 ）雖然最後以0.08秒之差屈居亞軍，仍然以1分52.16嘅成績喺香港田徑史冊劃下重要一頁。平時喺運動場上面見到方賢明，你可能會以為佢唔識廣東話，但 Sean 就話：「講跑步同講運動，應該冇問題！」今集《又係我牛英》，有呢位年輕跑手鉅細無遺地分享比賽當日嘅心路歷程，仲會講吓自己嘅訓練日常（用廣東話喎！）。 主持：牛英 嘉賓：中長跑運動員 方賢明 Sean Fontaine Sportunes 網站 | www.sportsoho.com/sportunes Instagram | www.instagram…

喺爵士樂中甚為重要嘅色士風，閒閒地都 7 磅，上低音色士風更加可以重達 15 磅，每次演奏猶如一課重訓，手臂少隻老鼠仔都搞唔掂！為咗令自己可以繼續有心有力喺最愛嘅音樂路上前行，色士風演奏家 程家慧（Chemie）會喺百忙之中抽時間健身同打泰拳，近年仲涉足埋比賽㖭！點解吹奏樂器嘅樂手唔係以游水練肺活量，而係要搽油練笑容企上健美舞台？被教練稱為「音樂格鬥家」嘅 Chemie，喺運動之中攞到啲咩人生靈感呢？手同嘴都係 Chemie 賴以維生嘅工具，預備泰拳比賽嘅時候有冇啲咩要特別注意？今集《Sportsomate》，有 Chemie 暫時放低支色士風，攞起拳套同你開心分享佢喺獨奏演出前嘅第二最愛。 主持：椰青 嘉賓：色士風演奏家 程家慧 Chemie Sportunes 網站 | www.spor…

即將喺年尾參加健美比賽比堅尼小姐項目嘅吳小燕（Katri），而家係合資格嘅健身教練，好難想像佢曾經係一位體重高達250磅嘅「肥妹仔」。用「肥妹仔」形容，係因為 Katri 喺小學六年級已經第一次經歷二字頭嘅體重。市面上標榜過可以減肥嘅方法，Katri 基本上都試過晒，但係點解都試過四度復胖到200磅？撞過咁多次板，Katri 話真係均衡飲食同恆常運動最有效，但仲有一樣嘢要特別注意，係關於咩㗎呢？今集《又係我牛英》，Katri 表示非常有信心唔會再度暴肥，各位想行減肥「捷徑」嘅朋友，聽完今集應該可以行少好多冤枉路。 主持：牛英 嘉賓：健身教練 吳小燕 Katri Sportunes 網站 | www.sportsoho.com/sportunes Instagram | www.instagr…

喺同一個舞池，你可以透過交換拍檔而得到一段3分鐘嘅友誼，呢個係事實，你改變唔到。嚟自 Swing Pocket 一代搖擺嘅葉雅澄（Claris）形容，搖擺舞係一個空間，將唔同年代、唔同背景、唔同性格嘅人聚合埋一齊。喺輕快嘅爵士樂下，互不認識嘅大家可以放低日間嘅面具，盡情以身體及各種舞步同對方一來一回地溝通，全盤接受對方同自己，I 仔 E 仔都一樣適合。Claris 同其他搖擺舞者仲不時會到唔同城市交流，從中亦發掘到各地嘅搖擺舞文化，而香港舞者，竟然係出名「磨爛蓆」？想知搖擺舞嘅由來，同埋點解手腳唔協調嘅人都會愛上呢個舞種？留意今集《Sportsomate》！ 主持：椰青 嘉賓：一代搖擺 葉雅澄 Claris Sportunes 網站 | www.sportsoho.com/sportunes…

喜歡泰拳嘅朋友，對方野師傅應該唔會陌生。今集《又係我牛英》，請嚟香港泰拳先驅方野師傅嘅仔方恒基先生，同我哋上一堂口述泰拳歷史。方恒基先生同樣熱愛泰拳，自細已經聽爸爸分享泰拳喺香港嘅發展史。喺爸爸口中，方恒基聽過好多武術泰斗嘅名字，除咗亮相武術電影，原來當年一班師傅仲有上《歡樂今宵》？方野師傅同曾經雄霸拳壇嘅「旋風腿」亞披勒嘅淵緣又係由邊度開始㗎呢？七、八十年代為人津津樂道嘅「紅擂台」賽事，如今由方恒基成為主辦人，佢想帶到啲咩畀拳迷？ 主持：牛英 嘉賓：紅擂台主辦人 方恒基 Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebook | www.…

年紀漸長，身體機能衰退係大自然定律。唔好話長者自己接受唔到，身邊嘅屋企人見到佢哋每日只可以坐喺屋企對住四面牆，甚至終日卧床，一樣唔好受。陳樂謙（阿謙）從事健身教練好幾年，主力訓練銀髮族學生，佢話老人家學員肯行出第一步，其實可以有非常唔同嘅中老年生活。透過簡單易明嘅訓練，學生能夠做到生活自理，去旅行、行山完全冇問題，跌親仲識笑，作為教練嘅阿謙有啲咩體會？跨代矛盾成日都聽到，阿謙同學生溝通嗰陣又遇過啲咩難處同趣事？今集《Sportsomate》，我哋同銀髮族健身教練陳樂謙一齊成為老靈魂，浸沉式體驗長者生活百態。 主持：椰青 嘉賓：銀髮族健身教練 陳樂謙 Sportunes 網站 | www.sportsoho.com/sportunes Instagram | www.instagram.com…

香港空手道運動員鄧宇軒，曾經奪得亞青賽金牌，更加喺 2023 年年底正式登上 U21 個人型世界排名第一。3 歲已經跟隨爸爸學習空手道，鄧宇軒喺習武路上已經走過將近二十年，但今時今日講起空手道嘅故事，依然剛勁十足，熱情依然。「訓練係好辛苦，但運動員一定可以搵到其中開心嘅地方。」成長路上可能放棄咗唔少個人玩樂時間，鄧宇軒就表示換返嚟嘅係無比珍貴嘅童年回憶。爸爸同時係教練，鄧宇軒幾歲人仔就已經著起道袍，浸沉喺呢項講求氣勢同個人演繹嘅運動裡面。今集《又係我牛英》，有鄧宇軒分享佢嘅天倫之樂以及比賽心得：打套拳嘅時候，佢嘅假想敵究竟係邊個？ 主持：牛英 嘉賓：U21個人形世界第一 鄧宇軒 Sportunes 網站 | www.sportsoho.com/sportunes Instagram | ww…

一年容易又端午，但要以年為單位累積對扒龍舟嘅熱愛，就一啲都唔容易。戴浩文（Herman）係香港中文大學龍舟會前隊長兼總務，見證住中大龍由冇得參加比賽，到近年愈玩愈有火，上年度喺大專龍舟錦標賽嘅成績更加係歷年之冠。Herman 喺中大龍接近四年，操龍操到身體壯咗兩個碼不在話下，連領導同團體合作嘅技巧都大躍進。「我哋係最強，因為我哋有你哋呢班隊友。」致力傳承中大龍精神嘅 Herman 形容，中大龍係一個家，嗰份歸屬感係因為大家對某啲嘢有一致嘅價值觀同目標先會出現。 主持：椰青 嘉賓：戴浩文 Herman @香港中文大學龍舟會 Sportunes 網站 | www.sportsoho.com/sportunes Instagram | www.instagram.com/sportunes_by_…

空手道，其中嘅技同術固然重要，但「道」都係不可忽略嘅一環。前香港空手道代表李剛慧，中學開始學習剛柔流空手道，對於當中嘅既剛且柔、收放自如，有自己一套理解。無論係運動上，定係生活上，其中嘅「道」都一直影響住剛慧，空手道同佢個人嘅成長之路密不可分。因為空手道，剛慧試咗好多新嘅嘢，其中包括參與電視劇《打天下2》嘅拍攝。劇中嘅李天愛同現實中嘅李剛慧有咩唔同？熱愛空手道嘅佢喺推廣呢個運動上面又有啲咩心得？ 主持：牛英 嘉賓：前香港空手道代表 李剛慧 Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebook | www.facebook.com/spor…

運動員都係人，總唔能夠一日24小時都咁熱血，尤其喺面對傷患或者運動生涯受阻嘅時候，學習先接受後處理可能更為適合。曾經懷疑過自己係咪外星人嘅香港跨欄代表梅政揚 （Mars)，運動員路上高高低低好幾回，接受同擁抱失敗係佢其中一個遇到困境嘅處理方法，外加由細到大都鍾意嘅畫畫，令佢嘅小宇宙可以喺框架外無限延伸。點解 Mars 特別鍾意喺創作中加入骷髏骨元素？運動員以外，Mars 仲想向邊方面發展呢？今集《Sportsomate》，椰青同你一齊喺天外天認識呢位跨欄運動員。 主持：椰青 嘉賓：香港跨欄代表 梅政揚 Mars Sportunes 網站 | www.sportsoho.com/sportunes Instagram | www.instagram.com/sportunes_by_sport…

為港爭光並唔係年輕運動員嘅專利，剛過去嘅 2024 第 21 屆全國常青田徑國際錦標賽，香港先進運動員何炳僑（Jacky）就喺65歲組別打破大會紀錄，以 42:26.64 完成 10000 米賽事；另外參加過兩次馬拉松，都只係用咗 3 個鐘頭多兩分鐘，Sub 3 指日可待，可以話係用行動證明咗畀大家睇，咩年紀嘅運動員都可以發光發亮。愈跑愈有嘅 Jacky 為咗可以不斷喺跑步路上突破自己，每次訓練完佢都會做一件事，食嘢方面都有一個小小嘅習慣畀大家參考。好有信心可以繼續刷新唔同紀錄嘅 Jacky ，除咗用短跑作為長跑訓練，仲有咩跑步貼士同心得畀大家？留意今集《又係我牛英》！ 主持：牛英 嘉賓：何炳僑 Jacky Sportunes 網站 | www.sportsoho.com/sportunes…

貪玩係人類天性，經常喺大圍出沒嘅長青板仔仁哥，就係一個好例子。雖然即將踏入70歲大關，玩滑板嘅資歷暫時只得兩年，但投入練習嗰份毅力可能比起你、我、甚至係帶佢入坑嘅仔仔仲要大。年輕嘅仁哥玩過網球、賽車、滑雪板等等，貪玩嘅癮可以話深入骨髓。年紀大係事實，仁哥直言而家學嘢確實冇以前咁快，但都無阻佢要學好滑板嘅決心：除咗落街同後生仔切磋板技，仁哥仲會自己喺YouTube搵教學片進修。學海無涯，有辦你睇！ 主持：椰青 嘉賓：長青板仔 仁哥 Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebook | www.facebook.com/sportunes…

「大家都係一張白紙，每個人嘅起步點唔同，冇需要同人比較。」跑步女生杜寶玉（Jade）如是說。Jade 自己都係 2016 年先開始跑步，更加係 3 年前先真正投入跑步訓練，但係成績就相當不錯，金澤初馬已經做到 3 小時 22 分嘅佳績，其後第一次參加渣馬就做到萬金小姐。當人人都以為 Jade 係因為一直都順順利利先講得出呢句說話，但其實佢喺呢幾年都有迷失同崩潰過，正正因為鑽過牛角尖，先悟出跑步對自己嘅意義。點解冇目標咁跑步會唔Work? 如果想不斷進步，有啲咩說話要時刻記住？ 主持：牛英 嘉賓：路跑素人 杜寶玉 Jade Sportunes 網站 | www.sportsoho.com/sportunes Instagram | www.instagram.com/sportunes_by_…

形容自己係工作狂嘅業餘跑手陳熙雯（Tammy）試過日做夜做、不見天日嘅生活模式，捱到鬼剃頭先醒覺自己想要嘅人生並唔係咁。呢啲時候，有人會推翻自己曾經經歷過嘅嘢，重新出發，而 Tammy 就決定捉緊累積嘅經驗開拓新嘅生活體驗：曾經喺時裝採購打滾多年，Tammy 可以親自物色適合製作運動衫嘅物料；因為熱愛西洋書法，可以自己設計運動衫； 因為鍾意跑步，可以創立自己嘅運動品牌。推倒重來唔係個個做到，好似跑步咁，一步一調整會唔會更適合你？ 主持：椰青 嘉賓：ATOM Running 主理人 陳熙雯 Tammy Sportunes 網站 | www.sportsoho.com/sportunes Instagram | www.instagram.com/sportunes_by_sportsoho F…

每次聽到「後生仔玩太極」，大家都一副難以置信嘅樣；但年青香港武術代表 楊頌熹 講起太極，就一臉驕傲，因為太極係佢搵人體極限嘅一個途徑。細細個已經視李小龍為偶像，楊頌熹四歲就主動同爸爸提出要習武，如今已經喺武術路上修行咗二十年有多。喺楊頌熹眼中，自己係一個武術「表演者」，所以每一場比賽都要用心預備，耍嘅每一個套路都要形神俱備，否則觀眾睇到嘅嘢就「得個殼」。太極嘅極限喺邊度？比賽場上嘅太極，同老人家喺公園耍嘅太極，又有啲咩分別？今集《又係我牛英》，有2024國際武術邀請賽男子太極劍銀牌得主 楊頌熹 同你分享佢嘅太極哲學。 主持：牛英 嘉賓：香港武術代表 楊頌熹 Sportunes 網站 | www.sportsoho.com/sportunes Instagram | www.instagram…

灣仔富德樓出名係一個文化及藝術集中地，點估到入面竟然有個地方孕育咗一班巴西柔術運動員？"Do Not Go Gentle Into That Good Night" 係一首嚟自威爾斯詩人 Dylan Thomas 嘅詩，同時係 Good Night Gym —— 一個運動文化空間嘅起源。形容為「空間」，因為參加者喺黑色嘅練習地墊上，除咗互相「糾纏」，仲有千百種互動嘅可能。參加「痛改前非肌肉班」、泰拳、巴西柔術等工作坊嘅人大部分都係文人，有鋼琴家、有編劇，亦有劇場中人，上堂前一齊睇一篇關於肌肉嘅散文、落堂寫封信畀一同練習嘅隊友⋯⋯運動嘅伸延，比我哋想像中更深、更遠。 主持：椰青 嘉賓：Good Night Gym 主理人 何倩彤 Sportunes 網站 | www.sportsoho.com…

成日聽人講大埔同馬鞍山係跑步好地方，但住過呢兩個地方嘅跑步新手馮健基（Morris），一年前根本唔明。一年後，Morris 除咗鍾意咗跑步，仲加入埋大埔民間體育會，幫手推廣跑步呢個運動。Morris 話以前嘅自己脾氣差又冇耐性，但跑步之後，照鏡都睇到自己嘅改變。跑步嘅好處，果然係跑咗步嘅人先分享得透徹，一個影響一個，跑圈就會愈嚟愈大。話就話主張 Fun Run , Morris 一樣跑到好成績，一年內玩完10K同半馬，嚟緊仲想挑戰埋全馬㖭！跑步冇你想像中咁難，由腳下一步開始就得，鍾意嘅話仲可以一班人一齊做同一件事，遍地都可以開跑！ 主持：牛英 嘉賓：大埔民間體育會成員 馮健基 Morris Sportunes 網站 | www.sportsoho.com/sportunes Instagra…

"Work Hard, Play Hard" 係唔少人嘅人生哲學，對香港空手道代表鄭栩彬（彬仔）嚟講亦然。無論係比賽定係玩，都要去盡先能夠獲得最大嘅滿足感。由青年組轉打成人組冇幾耐嘅呢位香港空手道新星，除咗早前喺亞錦賽凱旋而歸，亦曾經喺哈薩克攞過兩面亞青獎牌，但佢竟然話唔係咁想再去呢個地方？市民眼中嘅空手道運動員都比較嚴肅，彬仔喺呢個圈子係點自處㗎呢？椰青喺節目中同彬仔玩咗幾個殘酷二選一，今集《Sportsomate》一齊笑住聽吓呢位運動員嘅日常！ 主持：椰青 嘉賓：空手道搏擊代表 鄭栩彬 Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebo…

大隻就跑得慢? 想跑得好就唔可以有靚身型? 曾經奪得十大傑出教練同全港卓越教練獎嘅 Coach Perrie Lau, 今日就用自身經驗證明畀你睇，一切都只係都市傳說。只要你夠貪玩、夠貪靚，又接受到苦行僧般嘅生活，要魚與熊掌兼得其實冇話唔得。Perrie 除咗隻手瓜大到嚇親主持牛英，佢嘅運動表現一樣震懾到人。除咗健身同跑步，Perrie 連 Iron Man 三項鐵人都玩埋，成績仲要相當不錯！想知 Perrie cheat day 會食乜？練緊跑步速度同長度嘅同時，又點先可以Keep住大隻？即刻收聽今集《又係我牛英》啦！ 主持：牛英 嘉賓：健身及跑步教練 Perrie Lau Sportunes 網站 | www.sportsoho.com/sportunes Instagram | www…

運動品牌 lululemon 早前喺美國舉辦咗一個名為 FURTHER 嘅超級馬拉松，本地巴西柔術運動員郭苡彤（Vriko）係其中一位挑戰者。一年前，Vriko跑1公里都要唞幾次；一年後，佢實現咗「每日跑50公里」呢個目標，順利用六日完成303.313公里。跑步對Vriko嚟講，一直都唔係一個好嘅回憶，其中包括求學時期被欺凌嘅往事。不過呢一年，佢就因為每星期練30個鐘而同跑步建立咗一段新嘅關係。呢六日嘅超馬究竟係點過？烈日下喺沙漠不停兜圈跑嘅佢諗緊啲咩？Vriko話今次接受挑戰除咗想證明自己，仲背負咗更遠大嘅期盼，唔知會聽今集《Sportsomate》嘅你又會喺其中得到啲咩訊息呢？ 主持：椰青 嘉賓：超級馬拉松挑戰者 郭苡彤 Vriko Sportunes 網站 | www.sportsoh…

「你跳得好高喎！」咩係高？高嘅標準喺邊度？點解A球員同B球員跳起嘅高度相若，A球員長跳長有，但B球員喺第二場就受傷？除咗靠經驗同感覺去解答呢啲問題，其實用科學同數據去解釋，更有助提升運動員嘅表現。香港有好多好努力嘅運動員，不過資源分配不均嘅情況下，非精英級嘅運動員想攞到有關數據相對較難。有見及此，體能暨運動表現教練 Jacky Tam 就同拍檔開始咗 The Leapers Sports Lab，希望將運動科學普及化，令基層嘅運動愛好者都可以爭取到更有效嘅訓練，減少受傷機會，從而延長運動生涯。 主持：牛英 嘉賓：運動表現教練 Jacky Tam Sportunes 網站 | www.sportsoho.com/sportunes Instagram | www.instagram.com/s…

Voguing源自美國哈林區非裔及拉丁裔同志社群，當時嘅舞者因為搵唔到自己嘅容身之處，所以建立咗呢個能夠互相包容同照顧嘅「家」。喺保護罩下，舞者可以毫無保留地展現自己從未敢公開嘅一面，接納真我。時至今日，雖然歧視同負面評價已經大幅減少，但呢個「家」依然不斷擴展中，本地Voguing老師 KenKen Elle，亦係其中一位壯大香港Voguers社群嘅功臣。自大學接觸咗呢個舞種，KenKen同Voguing之間就多咗個等號：「我未必可以將紐約嘅Ballroom文化原汁原味咁帶返嚟，但我希望嚟到香港Ballroom嘅大家，一樣能夠感受當中嘅能量同愛。」 主持：椰青 嘉賓：本地Voguing老師 KenKen Elle Sportunes 網站 | www.sportsoho.com/sportu…